eine Kurtzgeschichte

[Raifi]

Wia da Jesus sei' erst's Wunder vollbracht hat

Eines Tages war’n da Jesus und seine Jünger zu ana Hochzeit beim Bergbräu in Kana eigladen, a kloane Ortschaft in de‘ Berg‘ vo Galiläa.

Es is recht lustig zuaganga, d’Braut hobn’s in’n Weinkeller verzogn ghabt und der Hochzeitslader hot an Bräutigam grad recht derbleckt, wia’s in der Küch‘ auf oamoi a Hektik geb’n hot. „So was Blöd’s aber aa,“ hobn d’Bedienungen an Wirt opulvert, „hast wieder net rechtzeitig beim Vertreter bstellt, jetzt is uns der Wein ausganga!“

D’Maria, am Jesus sei‘ Muatter, war aa dabei und hot an Jesus gebeten: „Jesus, bitte tua was, wenn ma net irgendwo an Wein herkriagn, nacha platzt die ganze Feier. Des waar a Schand‘ fürn Bräutigam und sei ganze Familie.“

Da Jesus hot bloß ganz cool erwidert: „Was tuast di‘ denn so ab, des geht doch di‘ und mi‘ gar nix o. Mei‘ Stund is no net da.“

D’Maria aber hot zu de‘ Bedienungen und de‘ Wirtsleut‘ gsagt: „Teats alles, was er euch oschafft.“ Sie hot nämlich scho gwußt, daß da Jesus die Brautleut‘ net im Stich lassen und sie vor derer Schand‘ bewahr’n taat.

Bei de‘ Juden war’s der Brauch, beziehungsweis‘ a religiöse Vorschrift, daß sie sich aa während’m Essen d’Händ‘ oiwei wieder gwaschen hobn.

Wia da Jesus gsehgn hot, daß die hohen Wasserkrüag, in dene as Wasser für die Gäste bereitghalten wordn is, leer warn, hot er zu de‘ Bedienungen gsagt: „Füllts die Krüag wieder mit Wasser auf, und dann bringt’s am Schankmoaster an Schoppn zum Probiern."

„Saxendi, is des a guats Tröpferl,“ hot der ganz erstaunt zum Bräutigam gsagt und sich as Mäu abgschleckt. „Normalerweis serviert ma‘ den guaten Wein glei‘ am Anfang, aber du hast as um’kehrt gmacht und den besten bis zum Schluß aufghobn. Respekt!“ hot er gmoant und sei Glasl austrunka. Er hot ja net gwusst, woher der guate Wein kemma is.

Des war des erste Wunder, des da Jesus vollbracht hot. Dadurch hot er sei Herrlichkeit offenbart, und seine Jünger hobn an eahm ‘glaubt.